|
.
56.
پنجابی ووٹراں نوں اک بینتی۔
اج توں تقریباً 20 کو ورھے پہلاں جنہاں قدراں قیمتاں نوں
برائی سمجھیا جاندا سی اوہ اج چنگیائی منیاں جان
لگیاں ہن۔ لوکاں نے بھرشٹاچار اپنا لیا ہے۔ لوک
سوچدے ہن کہ بناں پیسہ دتے کوئی کم ہو ہی نہیں
سکدا۔ پنجاب دے اج دے راج پربندھ نوں مافیہ راج
کیہا جان لگا ہے۔ مافیہ فرینچ شبد ہے جس دا ارتھ
ہے اوہ گروہ جو دوسریاں دی جائداد، کاروبار، پیسہ،
غیر قنونی ڈھنگ نال، دھکیشاہی نال، اپنے قبضے وچ
لے لیندا ہے۔ اج پنجاب وچ کئی طرحاں دے مافیہ گروہ
پیدا ہو گئے ہن۔ ایہہ اپنی پرپھلتا لئی ہر طرحاں
دی غنڈہ گردی کردے ہن
سرکار ولوں ایہناں گروہاں نوں پوری سرپرستی پردان کیتی
ہوئی ہے۔ ایہناں گروہاں ورودھ آواز اٹھاؤن والے
لئی موت جاں جیل یقینی ہے۔ ورودھی پارٹیاں بھی
ایہناں گروہاں ورودھ جاں ایہناں دی پالک سرکار
ورودھ آواز اٹھاؤن توں بھیبھیت ہن۔ کجھ راجنیتک
ایہناں گروہاں نال اتے ایہناں دی پالک سرکار نال
اندرونی سانجھ بنا کے رکھن وچ ہی اپنی بھلائی اتے
آرتھک لابھ سمجھدے ہن۔ اجیہے لیڈراں اتے اہنا دیاں
پارٹیاں دی اندرونی جانچ کرنا ہی اج ووٹر دا پنجاب
دی انتی اتے سدھاراں پرتی مکھ فرض ہے۔
پر اک گل تاں صاف ہے کہ جے تسیں پنجاب دا کجھ کرنا چاہندے
ہو تاں اپنا ووٹ لوکل پارٹی نوں پاؤ۔ بھاویں کسے
نوں بھی پاؤ۔ نیشنل پارٹیاں دے لیڈر ووٹ لین ویلے
تاں انیکاں طرحاں دے داعوے کردے ہن ۔ پر اہنا دی
پارٹی نیشنل پارٹی ہون کرکے، کسے خاص پرانت دا
وشیش دھیان رکھ کے، اپنے دوسرے پرانتاں دی قربانی
نہیں دے سکدی۔
مثال وجوں کانگرس نے تقریباً 55 سال بھارت تے راج کیتا
ہے۔ پنجابی بہت لمے سمیں لئی ڈفینس منسٹر، ہوم
منسٹر، پردھان منتری اتے راشٹر پتی رہے۔ پر پنجاب
لئی اک چھوٹی جہی سہولت بھی کیندر توں نہیں منوا
سکے۔ اوہ ایہہ کہ پنجاب کھیتی پردھان صوبہ ہے۔ اس
نوں پانی دی لوڑ ہے۔ دھرتی وچ بے اتھاہ پانی موجود
ہے۔ بوراں لئی بجلی چاہیدی ہے۔ اس نوں اک دو
ایٹومک پلانٹ ملنے چاہیدے ہن۔ پر نہیں دتے گئے۔
جدکہ کئی صوبیاں وچ درجن بھر پلانٹ لگ چکے ہن اتے
لگ رہے ہن۔
جہڑے سجن اج پھیر کانگرس لئی ووٹ منگ رہے ہن۔ ایہناں نوں
شرم محسوس کرنی چاہیدی ہے کہ اسیں 15 اگست 1947
توں پنجاب نوں لارے اتے دھوکھا دندے آ رہے ہاں۔
بھاویں کنی بھی وڈی پزیشن مل جائے، نیشنل پارٹی دا
لیڈر پنجاب لئی کجھ بھی نہیں کر سکدا۔ بادل پروار
بھی کیندر وچ رہا ہے۔ ایہہ دسن ایہناں پنجاب لئی
کی لیاندا ہے؟
کئی چنتک کہندے سنے گئے ہن کہ جد چوناں آؤندیاں ہن تاں
پارٹیاں کھمباں وانگ ابھر آؤندیاں ہن۔ ایہہ اداہرن
زیادہ ٹھیک نہیں بیٹھدی۔ کیونکہ کھنب تاں جے اک
وار پیدا ہو جائے، تاں کسے ناں کسے کم آ ہی جاندی
ہے۔۔ کہنا تاں ایہہ چاہیدا ہے کہ جد چوناں آؤندیاں
ہن پارٹیاں گڈویاں وانگ نکل آؤندیاں ہن۔ جنہاں
وارے ایہہ بھی پتہ نہیں لگدا کہ کویں پیدا ہوئیاں
سن اتے کویں ختم ہو جاندیاں ہن۔ ووٹر الجھن وچ پے
جاندا ہے۔ کس نوں چنیاں جاوے۔
نویاں پارٹیاں بنن دے مکھ تنّ مکھ کارن ہندے ہن۔
پہلا: کسے لیڈر ولوں اپنی پارٹی نال ناراضگی کارن نویں
پارٹی بناؤنا۔
دوجا: کسے کرپٹ پارٹی ولوں، اپنا پیسہ دے کے، ووٹراں نوں
دھوکھا دین لئی، نویں پارٹی بناؤنا۔
تیجا: حکمران پارٹی ولوں کیتی جا رہی لٹّ کھوہ توں،
چھٹکارا کرواؤن لئی، نویں پارٹی بناؤنا۔
ہن ایہہ فیصلہ کرنا مشکل ہے کہ کہڑی پارٹی پنجاب دی اصلیت
وچ ہتو ثابت ہووے گی۔ اس دا اندازہ پارٹی دے مکھی
دا پچھوکڑ، اسدا مینیپھیسٹو، اتے اسدا کہنی تے
کرنی توں ہی لگایا جا سکدا ہے۔ پنجاب وچ گیانی ذیل
سنگھ نے بھاویں پنج سال راج کیتا پر اوہ امرجینسی
دا سماں سی۔ برنالہ صاحب اتے بے انت سنگھ دے
تقریباً 5 سال پنجاب وچ ودروہ دا ماحول سی۔ صرف
بادل صاحب نوں ہی پوری آزادی نال راج کرن دا موقع
ملیا۔ جنہاں تقریباً 18 سال پنجاب اتے راج کیتا
ہے۔ اس لئی بادل صاحب دے راج دی کسے دوجے مکھ
منتری دے راج نال تلنا کرنی دلیل رہت ہووے گی۔
دوجے ارتھاں وچ پنجاب وچ جو اج حالات ہن ایہناں
لئی بادل صاحب ہی جمعے وار ہن۔
کجھ ویر اکثر کہندے سنے جاندے ہن کہ بھلی کسے نے بھی نہیں
کرنی۔ ایہہ کویں پتہ لگے کہ فلانا گھٹ لٹے گا؟
ویرو! اصل اتے نقل پچھانن دا اک بڑا سوکھا طریقہ
ہے۔ ہر چون سمیں کوئی ستھانک مصلیٰ بھارو ہندا ہے
جو چون اشو بندا ہے۔ اس سمیں پنجاب وچ بھرشٹاچار
اتے لٹیرا شاہی دا مصلیٰ ہے۔ ہر پارٹی ساہمنے دو
وچوں اک مشن دی چون کرن دا مصلیٰ ہے۔ پہلا مشن ہے
بھرشٹاچار، لٹیرا شاہی توں پنجاب دی سدیوی
ستنترتا۔ دوجا مشن ہے اتر کاٹو میں چڑاں۔ توں لٹّ
لیا، ہن میری واری۔
پہلے مشن والی پارٹی دے لیڈر اپنی جان جوخم وچ پاکے
بھرشٹاچار ورودھ آواز اٹھاؤندے ہن۔ بھرشٹاچار دے
خاتمے دا ودھان بنایا جاندا ہے۔ بھرشٹاچاریاں نوں
لوکاں ساہمنے لیا کے اہنا دے ظلم اتے کالے کارنامے
اجاگر کیتے جاندے ہن۔ تانکِ لوکاں وچ بھرشٹاچار
اتے ظلم ورودھ لڑن لئی اتشاہ پیدا ہووے۔ ایہناں دے
کن کن وچ بھرشٹاچار، ظلم، لٹّ کھوہ لئی نفرت ظاہر
ہندی ہے۔ ایہناں دی کرنی تے کہنی وچ کوئی فرق نہیں
ہندا۔ ایہناں دا پچھوکڑ اتے اتہاس اس دی پشٹی کردا
ہے۔
دوسرے مشن والے لیڈراں کول کوئی بھی پروگرام ہی نہیں
ہندا۔ اہنا کول ناں ہی کوئی اتہاس جاں پچھوکڑ ہندا
ہے۔ اہنا دی بھرشٹاچار نال اندرونی ہمدردی صاف
ظاہر ہندی ہے۔ اوہ کدے بھی بھرشٹاچار، ظلم، آدی
ورودھ کھل کے نہیں بولدے۔ اہنا کول کوئی انقلابی
پروگرام نہیں ہندا۔ اہنا دی بھلائی موجودہ ڈھانچہ
قایم رہن وچ ہی ہے۔ اہنا کول وار وار کہن لئی اکو
ہی شبد ہندا ہے کہ 2017 وچ ساڈی پارٹی دی سرکار
بنے گی۔ 2017 وچ میری سرکار بنے گی۔
اوہ ایہہ نہیں دس سکدے کہ جے اہنا دی پارٹی
دی سرکار بنے گی تاں کی کرے گی۔ جواب تسیں آپ ہی
سمجھ لؤ۔ جواب صاف ہے کہ جویں پہلے نے لٹیا ہے،
انج ہی اسیں کراں گے۔
ویرو کسے بھی وہن وچ بہکے پارٹی نہ بنو۔ ججّ بنو۔ سبھ دی
سنو۔ سبھناں دی کہنی تے کرنی پرکھو۔ اہنا دی پارٹی
دا پروگرام پچھو۔ اہنا دا چون مینیپھیسٹو دیکھو۔
اصلیت اپنے آپ تہاڈے ساہمنے آ جائے گی۔ کہ کس دا
کی مشن ہے۔
تسیں اک موڑ تے کھڑے ہو۔ تسیں فیصلہ کرنا ہے کہ تسیں کھوہ
وچوں نکل کے کھاتے وچ ڈگنا ہے، کہ پنجاب نوں لٹیرا
شاہی توں مکت کراؤنا ہے؟ بادل شاہی مافیہ، لٹّ
کھوہ، بھرشٹاچار، دا کھوہ ہے۔ اس وار اس دا صفایا
یقینی ہے۔ سوال ہے کہ بادل شاہی دی ہار توں بعد کی
کرنا ہے۔ میرے دہاتی انبھول ویر پھر 2014 وانگ
عامَ آدمی پارٹی وارے سوچ رہے ہن۔ اہنا نوں
کیجریوال جی دی اصلیت وارے اجے پتہ نہیں لگا۔
کیجریوال نوں ووٹ دینی مڑ دلی دی غلامی ہووے گی۔
ایہہ مڑ کھاتے وچ ڈگن والی گلّ ہے۔ جے تسیں سچ مچّ
ہی پنجاب نوں مافیہ گروپاں توں آزاد کرواؤنا
چاہندے ہو، تاں تہاڈی اپنی پنجاب دی لیڈرشپ پیدا
کرنی پئے گی۔ پنجاب دا اپنا لیڈر پیدا کرو جس وچ
بھرشٹاچار ختم کرن دی یوگتا ہووے۔
. |