|
.
05
کیپٹن نے نشر
کیتے دلی دنگیاں لئی ذمہ وار کانگرسیاں دے ناں
آپریشن بلیو
سٹار 'چ بادل دی بھومکا دا وی کیتا خلاصہ
چنڈی گڑھ، 7
فروری (اجیت بیورو)-سابقہ مکھ منتری کیپٹن امریندر
سنگھ نے مکھ منتری س: پرکاش سنگھ بادل 'تے آپریشن
بلیو سٹار ورگے گمبھیر مدعے توں سیاسی فائدہ چکن
دی کوشش کرن دا دوش لگاؤندیاں کیہا کہ س: بادل نے
آپریشن بلیو سٹار توں پہلاں تے بعد 'چ کئی وڈیاں
غلطیاں کیتیاں اتے بعد وچ خود بچن لئی اتر پردیش
دے باز پور 'چ اک فارم ہاؤس 'چ جا کے لک گئے، جہڑا
ہن اتراکھنڈ 'چ ہے | اوہناں مکھ منتری نوں سوال
کیتا کہ اوہ پنجاب 'چ اتواد دے کالے دناں دوران
مارے گئے 35000 بے قصور لوکاں دی ہتیا خلاف اک
شبد وی کیوں نہیں بولدے؟ اوہناں کیہا کہ 1984 دے
دنگیاں 'چ بھاجپا تے آر. ایسّ. ایسّ. دے ورکراں تے
آگوآں دی شمولیت سبندھی وی س: بادل دی چپی حیرانی
جنک ہے |
کیپٹن امریندر
سنگھ نے کیہا کہ 26 مئی، 1984 نوں دلی گیسٹ ہاؤس
وکھے رکھی اک میٹنگ، جتھے بادل اپنے دو ساتھیاں
نال تنّ کیندری منتریاں نوں ملے سن، توں بعد بادل
دے دو ساتھی تاں ترنت پنجاب لئی روانہ ہو گئے،
جدونکھ س: بادل آپ یو.پی. دے باز پور فارم ہاؤس 'چ
چلے گئے | اوہناں نے کیہا کہ 1 جون، 1984 نوں
پولیس تے سی. آر. پی. ایف. نے سری دربار صاحب نوں
گھیر لیا سی | اوہناں نے س: بادل نوں سوال کیتا ہے
کہ اوہ ایہناں حالات 'تے چپّ رہے اتے کیوں حالات
گمبھیر ہو جان دے باو جود اپنی ہمت دا ثبوت دندیاں
اوہ پنجاب نہیں پرتے | سابقہ مکھ منتری نے سوال
کیتا ہے کہ س. بادل اوہ سہں نوں قایم رکھن 'چ وی
ناکام رہے، جہڑی اوہناں نے سری اکال تخت صاحب دے
ساہمنے اپنے ساتھیاں نال کھادھی سی کہ اوہ کسے وی
فوجی آپریشن دا ساہمنا کرنگے اتے فوج نوں سری
دربار صاحب
اندر داخل ہون توں روکنگے، بھاویں اس لئی
اوہناں نوں اپنی جان دی قربانی کیوں نہ دینی پوے۔
پر اس دے الٹ اوہ باز پور چلے گئے اتے سبھ کجھ ختم
کرن توں بعد ہی واپس پرتے۔
اوہناں نے
خلاصہ کیتا کہ بادل نے بی. بی. سی دے پترکاراں
مارک تلی تے ستیش جیکب تکّ دے فون چکنے وی بند کر
دتے سن، جہڑے اس سچائی دا ثبوت ہن۔
کیپٹن امریندر
سنگھ نے س: بادل نوں کیہا کہ جویں کوئی اوہناں
دیاں غلطیاں لئی اوہناں دے بیٹے سکھبیر نوں دوشی
نہیں ٹھہرا سکدا، جہڑے اس ویلے اک نوجوان سن اتے
ودیشی یونیورسٹی 'چ پڑھ رہے سن، اوہ کانگرس میت
پردھان راہل گاندھی نوں وی آپریشن بلیو سٹار لئی
معافی منگن لئی نہیں کہہ سکدے، جو اس ویلے صرف 13
سالاں دے سن۔ کیپٹن نے کیہا کہ کانگرسیاں سبندھی
راہل نے سپشٹ کر دتا ہے کہ اوہ دلی دنگیاں 'چ شامل
ہو سکدے ہن اتے س: بادل ہن اوہناں دے ناں دتے جان
'تے زور پا رہے ہن۔ اوہناں کیہا کہ میں 31 اکتوبر،
1984 دی رات دنگے شروع ہون توں بعد 1 توں 3 نومبر
تکّ دلی 'چ سی تے اوہناں ساریاں شرنارتھیاں کول
گیا سی، جنہاں نے دلی دے وکھ-وکھ گوردواریاں 'چ
سہارا لیا ہویا سی۔ جہڑے ناں میں اس ویلے سنے سن،
اوہ ایچّ. کے. ایل. بھگت، دھرم داس شاستری، ارجن
داس، للت ماکن تے سجن کمار سن۔ پرنتو ایہناں 'چوں
پہلے چار ہن نہیں رہے اتے ہن پرماتما ہی اوہناں
نوں سزا دیویگا۔ جدکہ سجن کمار دا کیس اپنے اخیرلے
دور 'چ ہے اتے ہر کسے نوں عدالت دے فیصلے دا
انتظار کرنا چاہیدا ہے۔
کیپٹن امریندر
سنگھ 1984 دے سکھ ورودھی دنگیاں 'چ بھاجپا تے آر.
ایسّ. ایسّ. آگوآں دی بھومکا 'تے پرتیکریا ظاہر
کردیاں کیہا کہ بھاجپا تے آر. ایسّ. ایسّ. آگوآں
وچوں اوہناں نوں رام کمار جین، پریتم سنگھ، رام
چندر گپتا آدی دے نام دسے گئے جو دنگیاں 'چ شامل
سن۔ پر س: بادل نے اپنے سیاسی سانجھیدار ہون کارن
ایہناں بارے چپی بنائی رکھی ہے۔ اوہناں نے کیہا کہ
49 بھاجپا تے آر. ایسّ. ایسّ. آگوآں خلاف 1984 سکھ
ورودھی دنگیاں دے معاملے 'چ 14 معاملے درج ہوئے
سن۔ سابقہ مکھ منتری نے کیہا کہ اوہناں نوں بہت
دکھ ہندا ہے جدوں پنج وار مکھ منتری رہن والے بادل
ورگے آگوُ لوکاں دیاں بھاوناواں نال کھیڈدے ہن،
جدونکھ آپریشن بلیو سٹار توں پہلاں تے بعد کئی
غلطیاں لئی اوہ خود وی ذمہ وار ہن۔ اوہناں کیہا کہ
جس غیر-زمیوارانا ڈھنگ نال س. بادل نے فوج 'چ شامل
سکھاں نوں بغاوت کرن لئی کیہا سی اتے اوہناں دے
کہن 'تے کئی سکھ سپاہی بغاوت کر گئے تے 18 سالاں
تکّ جیلھاں 'چ رہے اتے کئی مارے وی گئے۔ پر کی
بادل اک وی ویکتی دا ناں دسّ سکدے ہن، جس دے جیل
رہن دوران اس دے پریوار دی ایہناں نے سہائتا کیتی
ہے جاں باہر آؤن توں بعد اس نوں نوکری دتی ہے؟
کیپٹن امریندر نے بادل نوں دوجیاں 'تے دوش لگاؤن
توں پہلاں اپنے اندر جھاکن دی صلاحَ دتی ہے، جہڑے
اوہناں حالات دا اپنے سیاسی فائدے لئی استعمال کر
رہے ہن، جنہاں 'چوں باہر نکلن لئی کئی قربانیاں
دینیاں تے لمبے سنگھرش کرنے پئے ہن۔
. |